பாகிஸ்தான் வீரர் சஹிப்ஸடா பர்ஹான் இரண்டாமிடம் முன்னேற்றம்; இந்திய வீரர்கள் அசத்தல்

சர்வதேச கிரிக்கெட் சபை (ஐசிசி) வெளியிட்டுள்ள புதிய டி20 தரவரிசைப் பட்டியலில் பாகிஸ்தானின் சஹிப்ஸடா பர்ஹான், துடுப்பாட்டப் பிரிவில் இரண்டாமிடத்தைப் பிடித்து அசத்தியுள்ளார். நடைபெற்று வரும் டி20 உலகக் கிண்ணத் தொடரில் இலங்கைக்கு எதிராக 100 ஓட்டங்கள் விளாசியதைத் தொடர்ந்து, மூன்றாமிடத்திலிருந்து ஓரிடம் முன்னேறி இந்தச் சாதனையைப் படைத்துள்ளார்.

தற்போது முதலிடத்தில் உள்ள இந்தியாவின் அபிஷேக் ஷர்மாவுக்கும் (874 புள்ளிகள்), பர்ஹானுக்கும் (848 புள்ளிகள்) இடையே வெறும் 26 புள்ளிகள் வித்தியாசமே இருப்பது குறிப்பிடத்தக்கது. இந்தத் தொடரில் இரண்டு சதங்கள் அடித்து, ஒரு டி20 உலகக் கிண்ணப் பதிப்பில் அதிக ரன்கள் குவித்த வீரர் என்ற சாதனையையும் பர்ஹான் படைத்துள்ளார்.

இந்திய வீரர்களும் பட்டியலில் அசத்தியுள்ளனர். சிம்பாப்வேக்கு எதிராக 38 ஓட்டங்கள் எடுத்த இஷன் கிஷன், ஐந்தாமிடத்திலிருந்து நான்காமிடத்திற்கு முன்னேறியுள்ளார். மேற்கிந்தியத் தீவுகளுக்கு எதிரான ஆட்டத்தில் 27 ஓட்டங்கள் எடுத்த திலக் வர்மா, ஏழாமிடத்திலிருந்து ஆறாமிடத்தைப் பிடித்துள்ளார்.

சகலதுறை வீரர்கள் பிரிவில், சிம்பாப்வேக்கு எதிராக அபாரமாக 50 ஓட்டங்கள் எடுத்த இந்தியாவின் ஹர்திக் பாண்டியா, மூன்றாமிடத்திலிருந்து இரண்டாமிடத்திற்கு முன்னேறியுள்ளார். இந்தப் பிரிவில் சிம்பாப்வேயின் சிகண்டர் ராசா தொடர்ந்து முதலிடத்தில் உள்ளார்.

பந்துவீச்சுப் பிரிவில், இலங்கைக்கு எதிராக 3 விக்கெட்டுகள் கைப்பற்றிய பாகிஸ்தானின் அப்ரார் அஹ்மட், ஐந்தாமிடத்திலிருந்து இரண்டு இடங்கள் முன்னேறி மூன்றாமிடத்தை அடைந்தார். மேற்கிந்தியத் தீவுகளுக்கு எதிராக 2 விக்கெட்டுகள் வீழ்த்திய இந்தியாவின் ஜஸ்பிரிட் பும்ரா, எட்டாமிடத்திலிருந்து ஓரிடம் முன்னேறி ஏழாமிடம் பிடித்துள்ளார். இந்தப் பிரிவில் இந்தியாவின் வருண் சக்கரவர்த்தி தொடர்ந்து முதலிடத்தில் நீடிக்கிறார்.

டி20 தரவரிசையில் முதல் 10 துடுப்பாட்ட வீரர்கள்:

1) அபிஷேக் ஷர்மா (இந்தியா) 2)சஹிப்ஸடா பர்ஹான் (பாகிஸ்தான்) 3)பில் ஸோல்ட் (இங்கிலாந்து) 4)இஷன் கிஷன் (இந்தியா) 5)பதும் நிஸங்க (இலங்கை)  6)திலக் வர்மா (இந்தியா) 7)சூரியகுமார் யாதவ் (இந்தியா)  8)டெவால்ட் பிறெவிஸ் (தென்னாபிரிக்கா)
9)ஜொஸ் பட்லர் (இங்கிலாந்து)  10)டிம் செய்ஃபேர்ட் (நியூசிலாந்து)