டெங்கு அச்சுறுத்தல் அதிகரிப்பு: நாடு முழுவதும் 42,000-க்கும் மேற்பட்டோர் பாதிப்பு

நாடு முழுவதும் பதிவாகியுள்ள டெங்கு நோயாளர்களின் எண்ணிக்கை தற்போது 42,000-ஐத் தாண்டியுள்ளதாக தேசிய டெங்கு கட்டுப்பாட்டு பிரிவின் பதில் பணிப்பாளர் டாக்டர் கபில கன்னங்கர தெரிவித்துள்ளார்.

டெங்கு நோய் பரவலைக் கட்டுப்படுத்தும் நோக்கில் ஒரு வாரகால சிறப்பு வேலைத்திட்டம் ஆரம்பிக்கப்பட்டுள்ளதாகவும் அவர் குறிப்பிட்டார்.

நோய் வேகமாகப் பரவி வருவதால், நாட்டின்  பல பகுதிகளில் உள்ள மருத்துவமனைகளின் நோயாளி கொள்ளளவு மீறப்பட்டுள்ளது என்று டாக்டர் கபில கன்னங்கரா மேலும் தெரிவித்தார்.

இதற்கிடையில், டெங்கு அச்சுறுத்தலை முறியடிக்க அனைவரும் ஒன்றிணைந்து செயல்பட வேண்டும் என்று பிரதமர் டாக்டர் ஹரினி அமரசூரிய தெரிவித்துள்ளார்.

கடந்த ஒன்றரை ஆண்டுகளில் எதிர்கொண்ட அனைத்து சவால்களையும் வெற்றிகரமாகச் சமாளித்ததைப் போலவே, இந்த நேரத்திலும் அனைவரும் ஒன்றிணைய வேண்டும் என்று பிரதமர் கூறினார்.

கொட்டாவ நகரில் உள்ள மகாரகம மாநகர சபை பகுதியில் நடைபெற்ற தேசிய டெங்கு கட்டுப்பாட்டு வாரத்தின் தொடக்க நிகழ்ச்சியில் பங்கேற்றபோது பிரதமர் டாக்டர் ஹரினி அமரசூரிய இந்தக் கருத்துக்களைத் தெரிவித்தார்.