“தவெகவிற்கு ஆதரவு இல்லை: திமுக கூட்டணியில் தொடர்வோம் – காதர் மொய்தீன் உறுதி”

தமிழக சட்டசபைத் தேர்தல் முடிவுகள் வெளியாகியுள்ள நிலையில், எந்தக் கட்சிக்கும் அறுதிப் பெரும்பான்மை கிடைக்காததால் மாநில அரசியலில் கடும் பரபரப்பு நிலவி வருகிறது. இதில் விஜய் தலைமையிலான தமிழர் வெற்றிக் கழகம் (தவெக) 108 ஆசனங்களை கைப்பற்றி மிகப்பெரிய கட்சியாக உருவெடுத்துள்ளது. எனினும் ஆட்சியமைக்க தேவையான 118 உறுப்பினர்களின் ஆதரவை பெற முடியாத நிலை ஏற்பட்டுள்ளது.

இந்த சூழலில் ஆட்சியை அமைக்கும் முயற்சியில் தவெக தீவிரமாக ஈடுபட்டு வருகிறது. காங்கிரஸ் கட்சி தனது 5 உறுப்பினர்களின் ஆதரவை வழங்க முன்வந்ததை அடுத்து, தவெக அணியின் பலம் 113 ஆக உயர்ந்துள்ளது. இருப்பினும் பெரும்பான்மையை எட்ட இன்னும் 5 உறுப்பினர்களின் ஆதரவு தேவைப்படுகிறது.

இதனிடையே திருமாவளவன் தலைமையிலான விடுதலை சிறுத்தைகள் கட்சி (VCK) 3 உறுப்பினர்களையும், இந்திய கம்யூனிஸ்ட் கட்சி (CPI) 1 உறுப்பினரையும், மார்க்சிஸ்ட் கம்யூனிஸ்ட் கட்சி (CPM) 2 உறுப்பினர்களையும் கொண்டுள்ளன. இக்கட்சிகளின் ஆதரவை பெறுவதற்காக தவெக தரப்பு தொடர்ந்து பேச்சுவார்த்தையில் ஈடுபட்டு வருகிறது.

இந்நிலையில் தமிழக அரசியலில் கவனம் ஈர்த்த முக்கிய அரசியல் சந்திப்பாக, இந்தியன் யூனியன் முஸ்லிம் லீக் கட்சியின் தேசிய தலைவர் காதர் மொய்தீனை தவெக நிர்வாகி அருண் ராஜ் நேரில் சந்தித்து ஆதரவு கோரியுள்ளார். இந்த சந்திப்பு அரசியல் வட்டாரங்களில் பெரும் எதிர்பார்ப்பை ஏற்படுத்தியது.

ஆனால் இந்த சந்திப்புக்குப் பின்னர் இந்தியன் யூனியன் முஸ்லிம் லீக் (IUML) தரப்பு, தவெகவிற்கு ஆதரவு வழங்க முடியாது எனத் தெளிவாக அறிவித்துள்ளது. மேலும் திமுக கூட்டணியில் தொடர்வதாகவும் அறிவிக்கப்பட்டுள்ளது.

இதுகுறித்து கருத்து தெரிவித்த காதர் மொய்தீன், தங்களது கட்சி தொடர்ந்து மதச்சார்பற்ற முற்போக்கு கூட்டணியில் இருந்து வருவதாகவும், அந்த கொள்கை நிலைப்பாட்டின் அடிப்படையில் தவெகவிற்கு ஆதரவு அளிக்க இயலாது என்றும் தெரிவித்துள்ளார். மேலும் “முதலமைச்சர் மு.க. ஸ்டாலின் சொல்வதை அப்படியே கேட்போம். திமுக கூட்டணியில் நேற்று இருந்தோம், இன்று இருக்கிறோம், நாளையும் இருப்போம்” எனவும் அவர் உறுதியாக தெரிவித்துள்ளார்.

இந்த கருத்து, திமுக கூட்டணியிலிருந்து விலகும் எண்ணமே முஸ்லிம் லீக்கிற்கு இல்லை என்பதையும், ஸ்டாலின் தலைமையிலான கூட்டணிக்கு தொடர்ந்து ஆதரவாக இருப்பதையும் வெளிப்படுத்துகிறது என அரசியல் பார்வையாளர்கள் கூறுகின்றனர்.

முஸ்லிம் லீக்கின் இந்த நிலைப்பாடு, ஏற்கனவே பெரும்பான்மையை எட்டுவதற்கான எண்ணிக்கையில் சவாலை எதிர்கொண்டு வரும் தவெக அணிக்கு பின்னடைவாக பார்க்கப்படுகிறது. முக்கிய கூட்டணி கட்சிகளின் ஆதரவு கிடைக்காததால் தவெக அணியில் கவலை நிலவி வருகிறது.

இதனிடையே, தவெக தொடர்ந்து பிற கட்சிகள், சுயேட்சை உறுப்பினர்கள் மற்றும் சிறு பிராந்திய கட்சிகளுடன் பேச்சுவார்த்தைகளை முன்னெடுத்து வருவதாக தகவல்கள் வெளியாகியுள்ளன. தமிழகத்தில் அடுத்த அரசு யார் அமைப்பார்கள் என்ற கேள்வி அரசியல் வட்டாரங்களில் தீவிர விவாதமாக மாறியுள்ள நிலையில், அடுத்த சில நாட்கள் மாநில அரசியலில் மிக முக்கியமானதாக கருதப்படுகிறது.