கொள்கலன் லாரிகள்களுக்கு தடையற்ற எரிபொருள் விநியோகம்

கொழும்பு துறைமுகத்தில் நெரிசலைக் குறைப்பதற்கும், இறக்குமதி மற்றும் ஏற்றுமதி சரக்குகளின் தடையற்ற போக்குவரத்தை உறுதிப்படுத்துவதற்குமான முயற்சிகளின் ஒரு பகுதியாக, கொள்கலன் லாரிகளுக்கு போதுமான எரிபொருள் விநியோகத்தை உறுதி செய்யும் வகையில் ஒரு முறையான செயல்முறை தயாரிக்கப்பட்டு வருகிறது.

துறைமுகங்கள் மற்றும் சிவில் விமானப் போக்குவரத்து அமைச்சர் அனுர கருணாதிலக, கொள்கலன் போக்குவரத்து வாகனங்களுக்குப் போதுமான எரிபொருளை வழங்குவதற்காக கட்டமைக்கப்பட்ட ஒரு முறையை அறிமுகப்படுத்தும் நடவடிக்கைகளைத் தொடங்கியுள்ளார். துறைமுகத்திலிருந்து இறக்குமதி செய்யப்பட்ட கொள்கலன்களை விரைவாக விடுவிப்பதும், ஏற்றுமதி கொள்கலன்கள் சரியான நேரத்தில் விநியோகிக்கப்படுவதை உறுதி செய்வதும், அதன் மூலம் நாட்டின் ஏற்றுமதி வருவாயைப் பாதுகாப்பதும் இந்தப் புதிய முறையின் முக்கிய நோக்கமாகும்.

க்யூஆர் குறியீடுகள் மூலம் துல்லியமான விநியோகம்

இந்தச் செயல்முறையின் ஒரு பகுதியாக, கொள்கலன் போக்குவரத்து வாகன உரிமையாளர்கள் சங்கத்தின் தலைவருக்கு, வாகனங்களின் க்யூஆர் (QR) குறியீடுகள் உள்ளிட்ட விரிவான தரவுகளைச் சமர்ப்பிக்குமாறு அறிவுறுத்தப்பட்டுள்ளது. இந்த நடவடிக்கையானது, முறையான பதிவுகள் மூலம் முரண்பாடுகள் இன்றி துல்லியமான மற்றும் திறமையான எரிபொருள் விநியோகத்தை எளிதாக்கும் என எதிர்பார்க்கப்படுகிறது.

அதன்படி, 1,325 கொள்கலன் சரக்குந்துகள் தொடர்பான தரவுகள் இன்று (மார்ச் 20) அமைச்சகத்திடம் சமர்ப்பிக்கப்பட்டன. இந்தத் தரவுகள் அடிப்படையிலேயே எரிபொருள் விநியோக முறை மேலும் விரைவுபடுத்தப்படும்.

எரிபொருள் ஒதுக்கீடு அதிகரிப்பு குறித்தும் பேச்சுவார்த்தை

போதுமான எரிபொருள் ஒதுக்கீடு இல்லை என்பது குறித்து கொள்கலன் லாரி உரிமையாளர்கள் எழுப்பிய கவலைகளைத் தொடர்ந்து, சம்பந்தப்பட்ட தரப்பினருடன் கலந்தாலோசித்து, தற்போதுள்ள ஒதுக்கீட்டை மறுபரிசீலனை செய்து அதிகரிப்பதற்கான திட்டங்களும் செயல்படுத்தப்பட்டு வருகின்றன.

விரைவான தீர்வைச் செயல்படுத்துவதற்காக இலங்கை பெட்ரோலியக் கூட்டுத்தாபனத்தின் (CPC) அதிகாரிகளுடன் கலந்துரையாடல்கள் நடத்தப்படும் என்றும் அமைச்சர் கருணாதிலக தெரிவித்தார். இந்தக் கலந்துரையாடல்களில், தற்போதைய எரிபொருள் ஒதுக்கீட்டை அதிகரிப்பது உள்ளிட்ட நீண்டகால தீர்வுகள் குறித்து ஆராயப்படும்.

விரைவான தீர்வுக்கு முக்கியத்துவம்

துறைமுகத்தின் செயல்பாடுகளை சீராக பராமரிப்பதிலும், சரக்கு போக்குவரத்தில் ஏற்படும் தாமதங்களைத் தவிர்ப்பதிலும் இந்த எரிபொருள் விநியோக முறை முக்கிய பங்கு வகிக்கும் என்று அமைச்சர் வலியுறுத்தினார். கொள்கலன் போக்குவரத்துத் துறையில் உள்ள பிரச்சினைகளை அடையாளம் கண்டு, உரிய தரப்புகளுடன் இணைந்து விரைவான நடவடிக்கைகளை மேற்கொள்ளவும் அமைச்சர் அறிவுறுத்தியுள்ளார்.