கட்டுநாயக்க விமான நிலையத்தில் போதைபொருட்களுடன் 22 பெளத்த பிக்குகள் கைது!!

கட்டுநாயக்க சர்வதேச விமான நிலையம் வரலாற்றில் மிகப்பெரிய போதைப்பொருள் கடத்தல் முயற்சி முறியடிக்கப்பட்டுள்ளது. 110 கோடி ரூபாய்க்கும் அதிக மதிப்புடைய ‘குஷ்’ மற்றும் ‘ஹஷிஷ்’ (கஞ்சா சார்ந்த போதைப்பொருள் வகைகள்) உடன் தொடர்புடையதாக சந்தேகிக்கப்படும் 22 பெளத்த பிக்குகள் கைது செய்யப்பட்டுள்ளனர்.ங

இந்தச் சம்பவம், கட்டுநாயக்க விமான நிலைய வரலாற்றில் இதுவரை இல்லாத அளவுக்கு பெரிய அளவில் போதைப்பொருள் பறிமுதல் செய்யப்பட்ட நிகழ்வாகவும், பிக்குகள் இவ்வாறு ஒருங்கிணைந்த குழுவாக சம்பந்தப்பட்டுள்ள முதல் பெரிய வழக்காகவும் கருதப்படுகிறது.

பொலிஸ் போதைப்பொருள் தடுப்பு பிரிவு பொலிஸ் போதைப்பொருள் கட்டுப்பாட்டு பணியகம் அதிகாரிகளுக்கு கிடைத்த விசேட ரகசிய தகவலின் அடிப்படையில் நேற்று (25) இரவு இந்த சோதனை நடவடிக்கை மேற்கொள்ளப்பட்டது.

சந்தேகநபர்கள் எடுத்துச் சென்ற பயணப்பெட்டிகளில் பள்ளி உபகரணங்கள் மற்றும் இனிப்புகளுக்குள் மறைத்து, போலியான அடித்தளங்களுடன் பதுக்கப்பட்ட நிலையில் 110 கிலோகிராமுக்கு அதிகமான போதைப்பொருட்கள் அதிகாரிகளால் கண்டுபிடிக்கப்பட்டன. ஒவ்வொருவரும் 5 கிலோகிராமுக்கு மேற்பட்ட அளவில் போதைப்பொருளை எடுத்துச் சென்றிருந்ததாகவும் தெரியவந்துள்ளது.

மேலும் விசாரணைகளில், இந்தக் குழுவினர் ஒரு நிதி ஆதரவாளரின் திட்டத்தின் கீழ் கடந்த 22ஆம் தேதி தாய்லாந்தின் Bangkok (பாங்காக் நகரம்) சென்றிருந்தனர். அங்கு தங்கியிருந்த காலத்தில் சாதாரண நபர்களைப் போல உடை அணிந்து இயங்கியதற்கான புகைப்படங்கள் மற்றும் காணொளிகள் அவர்களின் கைப்பேசிகளில் இருந்து மீட்கப்பட்டுள்ளன.

முதற்கட்ட விசாரணைகளின் படி, கைது செய்யப்பட்டவர்கள் தீவின் பல்வேறு பகுதிகளைச் சேர்ந்த, உயர் கல்வி பயிலும் இளம் பிக்குகள் என அடையாளம் காணப்பட்டுள்ளனர். சிலர் வெளிநாட்டு கல்வி மற்றும் பயிற்சி வாய்ப்புகளை பயன்படுத்தி இந்த வலையமைப்பில் இணைக்கப்பட்டிருக்கலாம் எனவும் அதிகாரிகள் சந்தேகிக்கின்றனர்.

இந்தக் கடத்தல் நடவடிக்கை “புனித நிகழ்வு” என்ற பெயரில் மறைக்கப்பட்டிருந்ததாகவும், அது தற்போது நாடு முழுவதும் பெரும் அதிர்ச்சியையும் கவலையையும் ஏற்படுத்தியுள்ளதாகவும் தெரிவிக்கப்பட்டுள்ளது. மத அமைப்புகளும் இந்த சம்பவம் குறித்து தீவிர கவலை வெளியிட்டுள்ளன.

கைது செய்யப்பட்டவர்கள் மேலதிக விசாரணை களுக்காக நீர்கொழும்பு நீதவான் நீதிமன்றம்  நீதிமன்றம் இன்று(26) ஆஜர்படுத்தப்படவுள்ளனர்.

மேலும், இந்த சம்பவத்துடன் தொடர்புடைய நிதி ஆதரவாளர்கள், சர்வதேச போதைப்பொருள் வலையமைப்புகள் மற்றும் உள்ளூர் ஒத்துழைப்பாளர்கள் குறித்து விசாரணைகள் விரிவுபடுத்தப்பட்டுள்ளதாகவும், எதிர்வரும் நாட்களில் மேலும் கைது நடவடிக்கைகள் இடம்பெற வாய்ப்பு உள்ளதாகவும் பாதுகாப்பு தரப்புகள் தெரிவித்துள்ளன.

இந்த சம்பவம், நாட்டில் போதைப்பொருள் கடத்தல் வலையமைப்புகள் எவ்வளவு நுணுக்கமாக செயல்படுகின்றன என்பதையும், அவற்றை கட்டுப்படுத்தும் நடவடிக்கைகள் இன்னும் வலுப்படுத்தப்பட வேண்டிய அவசியத்தையும் வெளிப்படுத்துகிறது.