அரச ஊடக ஆலோசகரின் முரட்டுத்தனத்திற்கு இலங்கை உழைக்கும் ஊடகவியலாளர் சங்கம் கண்டனம்

ஜனாதிபதியின் ஊடக ஆலோசகரின் உடல்ரீதியான தாக்குதல்: ஊடக சுதந்திரத்திற்கு அதிர்ச்சியூட்டும் பின்னடைவு

இலங்கைக்கு வருகை தந்துள்ள வணக்கத்திற்குரிய பன்னாகர தேரர் தலைமையிலான  பௌத்த துறவிகளின் அகிம்சைவழி சமாதான  பேரணியைச் செய்தி சேகரிக்கச் சென்ற லேக்ஹவுஸ்  ஊடகவியலாளர் புவனேக எஸ். பெரேராவை, ஜனாதிபதியின் ஊடக ஆலோசகர் சந்தன சூரியபண்டார தம்புள்ளையில் வைத்து உடல்ரீதியாகத் தாக்கி அச்சுறுத்திய சம்பவம், ஊடக சுதந்திரத்திற்கு ஏற்பட்டுள்ள ஓர் அதிர்ச்சியூட்டும் பின்னடைவாகும்.

ஊடகவியலாளர் என்ற வகையில், அரச அதிகாரிகள் தங்களைப் ஊடகவியலாளர்களை உடல்ரீதியாக மிரட்டுவதற்கும், பொது நிகழ்வுகளை யார் செய்தி சேகரிக்கலாம் என்று கட்டளையிடுவதற்கும் தகுதியுடையவர்களாகக் கருதும் ஓர் ஆபத்தான பகுதி உருவாகி வருவதை நான் காண்கிறேன்.

அமைதிப் பேரணியைச் செய்தி சேகரிக்க 'சிரச'வுக்கு மட்டுமே உரிமை உண்டு என்று கூறுவதன் மூலம், சூரியபண்டார ஒரு ஊடக ஆலோசகராக மட்டுமல்ல; அரச பதவியை வகித்துக்கொண்டு ஒரு தனியார் ஊடக ஏகபோகத்திற்கான ஊடக வாயில்காப்பாளராகச் செயற்படுகிறார். இதுவே தேசிய மக்கள் சக்தியின் 'புதிய கலாசாரம்' எனில், அது பொறுப்புக்கூறலை ஒரு தள்ளலால் மௌனமாக்கும் கலாசாரமாகும்.

ஜனாதிபதி முடிவு செய்ய வேண்டும்: அவரது ஊடக அலுவலகம் தகவலை எளிதாக்குவதற்காக உள்ளதா, அல்லது முரட்டுத்தனமான அமுலாக்கப் பிரிவாகச் செயற்படவா?

இந்தச் சம்பவத்தைக் கண்டித்து இலங்கை உழைக்கும் ஊடகவியலாளர்கள் சங்கம் ஜனாதிபதி அனுர குமார திசாநாயக்க மற்றும் ஊடக அமைச்சர் நலிந்த ஜயதிஸ்ஸ ஆகியோருக்குக் கடிதம் ஒன்றை அனுப்பியுள்ளது.

இலங்கையில் தற்போது முன்னெடுக்கப்பட்டு வரும் துறவிகளின் அகிம்சைவழி சமாதான  பேரணியைச் செய்தி சேகரிக்கச் சென்ற லேக்ஹவுஸ் ஊடக நிறுவனத்தின் இரண்டு ஊடகவியலாளர்களை உடல் ரீதியாகத் தாக்கி, அவர்களின் தொழில்சார் கடமைகளைச் செய்யவிடாமல் தடுத்து, அச்சுறுத்தி விரட்டிய சம்பவம் தொடர்பில் இலங்கை உழைக்கும் ஊடகவியலாளர்கள் சங்கம் தனது வெறுப்பையும் கண்டனத்தையும் தெரிவிக்கின்றது.

அரசாங்கத்தின் கட்டுப்பாட்டின் கீழ் இயங்கும் அரச ஊடக நிறுவனமான லேக்ஹவுஸைச் சேர்ந்த ஊடகவியலாளர் புவனேக எஸ். என்பவரை, உங்கள் அரசாங்கத்தின் ஊடக ஆலோசகரே தம்புள்ளையில் வைத்து முரட்டுத்தனமாகத் தாக்கியுள்ளமை கடும் அதிர்ச்சியளிக்கிறது. அதே நிறுவனத்தைச் சேர்ந்த பெரேரா மற்றும் மற்றுமொரு ஊடகவியலாளரும் இதற்கு இலக்காகியுள்ளனர் என்பது கேலிக்கூத்தாக உள்ளது.

உங்கள் ஊடக ஆலோசகர், ஒரு பொது அதிகாரியின் அதிகார எல்லையை மீறி, ஒரு தனியார் ஊடக நிறுவனத்திற்குத் தேவையற்ற முறையில் சாதகமாகச் செயற்படும் விதத்தில் நடந்துகொண்டுள்ளார். இது உங்கள் ஆட்சியின் ஊடகக் கொள்கையின் ஒரு சிறந்த பிரதிபலிப்பாகவே நாங்கள் கருதுகிறோம்; எமது ஆழ்ந்த வருத்தத்தையும் பதிவு செய்கிறோம்.

உங்கள் ஊடக ஆலோசகர் சந்தன சூரியபண்டாரவின் இந்தத் தாக்குதல், முந்தைய அரசாங்கம் கொண்டு வந்த அடக்குமுறைச் சட்டங்கள், 'தேசிய ஊடகக் கொள்கை' எனப்படும் போர்வை, பயங்கரவாதத் தடைச் சட்டம் (PTA), இணையப் பாதுகாப்புச் சட்டம் (OSA) ஆகியவற்றின் தொடர்ச்சியாகவும், பேச்சு மற்றும் கருத்து வெளிப்பாட்டுச் சுதந்திரத்தைப் பறிப்பதற்காக கலாசார அமைச்சின் அதிகாரிகள் பாதுகாப்பு அமைச்சில் தஞ்சம் புகுந்து செயற்படும் நடைமுறையின் வெளிப்பாடாகவும் இன்று பெரும் சர்ச்சையை ஏற்படுத்தியுள்ளது. இது ஒரு அடக்குமுறை எந்திரத்தின் நீட்சியே என்பது மிகத் தெளிவாகிறது.

எனவே, இலங்கையில் ஊடக சுதந்திரத்தைச் சீரழிக்கும் இவ்வாறான அரசாங்கத்தின் முரட்டுத்தனமான செயல்களை உடனடியாக நிறுத்தி, ஊடகவியலாளர்கள் தங்கள் தொழில்சார் கண்ணியத்துடன் கடமையாற்றுவதற்கான சூழலை உருவாக்கித் தருவதில் உங்கள் உடனடி கவனத்தைச் செலுத்துமாறு கேட்டுக்கொள்கிறோம்.

 ஆகவே, இந்த நாட்டில் உங்கள் அரசால் ஒடுக்கப்பட வேண்டியது ஊடகங்களோ ஊடகவியலாளர்களோ அல்ல; மாறாக, உங்கள் கீழ் இவ்வாறான முரட்டுத்தனச் செயல்களைச் செய்து அரசையே அவப்பெயருக்கு உள்ளாக்கும் உங்கள் ஊடக ஆலோசகர் போன்ற அதிகாரிகளே என்பதை இலங்கை உழைக்கும் ஊடகவியலாளர்கள் சங்கம் வலியுறுத்துகின்றது.