ஹோர்முஸ் ஜலசந்தி வழியாகச் சென்ற தாய்லாந்தின் 'மயூரி நரீ' என்ற சரக்குக் கப்பல் மீது ஈரான் ஏவுகணைத் தாக்குதல் நடத்தியதாகக் கூறப்படும் சம்பவம், அப்பகுதியில் பெரும் பதற்றத்தை ஏற்படுத்தியுள்ளது. இத்தாக்குதலில் கப்பலில் இருந்த 23 தாய்லாந்து பணியாளர்களில் 20 பேர் பத்திரமாக மீட்கப்பட்டனர். மீதமுள்ள மூவரை மீட்கும் பணி தீவிரமாக நடைபெற்று வருவதாக தாய்லாந்து கடற்படை தெரிவித்துள்ளது.
ஓமான் கடற்கரைக்கு வடக்கே சுமார் 11 கடல் மைல்கள் (சுமார் 18 கி.மீ) தொலைவில் இந்தத் தாக்குதல் நடந்துள்ளது. ஐக்கிய அரபு எமிரேட்ஸின் கலீஃபா துறைமுகத்திலிருந்து புறப்பட்ட இந்தக் கப்பல், இந்தியா நோக்கிச் சென்று கொண்டிருந்த போதே இந்தச் சம்பவம் நிகழ்ந்துள்ளதாக தகவல்கள் தெரிவிக்கின்றன.
தாக்குதல் குறித்த தகவல் கிடைத்ததும், ராயல் தாய் கடற்படை உடனடியாக சர்வதேச கடல்சார் அதிகாரிகளுடன் இணைந்து செயல்பட்டு வருகிறது. கப்பலில் இருந்தவர்களின் பாதுகாப்பை உறுதி செய்ய தேவையான அனைத்து நடவடிக்கைகளும் எடுக்கப்பட்டுள்ளதாக அதிகாரிகள் தெரிவித்துள்ளனர்.
இதனிடையே, இந்த ஒரு கப்பல் மட்டுமின்றி, ஹோர்முஸ் ஜலசந்தியில் அதே நாளில் குறைந்தது இரண்டு கப்பல்கள் மீது தாக்குதல் நடத்தப்பட்டதாக அதிகாரிகள் உறுதிப்படுத்தியுள்ளனர். இது உலகின் மிக முக்கியமான கடல்வழிப் பாதையில் பாதுகாப்பு குறித்த கடும் கவலைகளை எழுப்பியுள்ளது.
ஹோர்முஸ் ஜலசந்தி மூடப்படும் அபாயம் குறித்து ஐ.நா. எச்சரிக்கை
இந்நிலையில், ஹோர்முஸ் ஜலசந்தியில் ஏற்பட்டுள்ள பதற்றம் காரணமாக, அந்த முக்கியமான கடல்வழிப் பாதை மூடப்படும் அபாயம் இருப்பதாக ஐக்கிய நாடுகள் சபை கடும் எச்சரிக்கை விடுத்துள்ளது. எண்ணெய் டேங்கர்களின் இயக்கத்தைத் தடுக்கும் வகையில் ஈரான் அப்பகுதியில் தனது கடற்படை இருப்பை அதிகரித்துள்ளது. இது உலகளாவிய எரிசக்தி நெருக்கடிக்கு வழிவகுக்கும் என்ற அச்சம் நிலவுகிறது.
Editor
