இலங்கை கடல் பகுதியில் ஈரான் டிபானி’ எண்ணெய் கப்பலை அமெரிக்கா சிறைபிடித்தது

இலங்கையின் தென்கிழக்குப் பகுதியில் சர்வதேச கடல் பரப்பில் பயணம் செய்த ஈரான் தொடர்புடையதாக சந்தேகிக்கப்படும் மிகப்பெரிய கச்சா எண்ணெய் கப்பல் **‘டிஃபானி’ (M/T Tifani)**யை அமெரிக்க கடற்படை பறிமுதல் செய்துள்ளதாக வெளிநாட்டு ஊடகங்கள் செய்தி வெளியிட்டுள்ளன.

மெரைன் டிராஃபிக் தரவுகள் மற்றும் பாதுகாப்பு அமைப்புகளின் தகவலின்படி, இந்த நடவடிக்கை இலங்கை கடற்கரையிலிருந்து சுமார் 700 கிலோமீட்டர் தூரத்தில் நடைபெற்றுள்ளது. குறித்த கப்பல் ஈரானிலிருந்து சிங்கப்பூரை நோக்கி பயணித்துக் கொண்டிருந்தது எனவும் கண்டறியப்பட்டுள்ளது.

சுமார் 3 இலட்சம் டன் கொள்ளளவு கொண்ட இந்த மிகப்பெரிய எண்ணெய் கப்பல், முன்பே அமெரிக்காவின் வெளிநாட்டு சொத்து கட்டுப்பாட்டு அலுவலகமான Office of Foreign Assets Control (OFAC) மூலம் தடைகள் விதிக்கப்பட்ட பட்டியலில் இடம்பெற்றிருந்ததாக தெரிவிக்கப்படுகிறது. இது ஈரான் கச்சா எண்ணெயை சட்டவிரோதமாக கடத்தும் “ஷாடோ ஃப்ளீட்” வலையமைப்புடன் தொடர்புடையதாக அமெரிக்க அதிகாரிகள் சந்தேகிக்கின்றனர்.

கப்பலின் பயண விவரங்களின்படி, அது ஏப்ரல் 10ஆம் தேதி Persian Gulf பகுதியிலிருந்து புறப்பட்டு, ஏப்ரல் 18ஆம் தேதி இலங்கையின் Galle துறைமுகத்திற்கு அருகிலான கடற்பரப்பில் தற்காலிகமாக நின்றுள்ளது. பின்னர், ஏப்ரல் 21ஆம் தேதி இலங்கையின் தென்கிழக்கில் சுமார் 700 கி.மீ. தூரத்தில் அமெரிக்க கடற்படையால் கைப்பற்றப்பட்டது.

இந்நிலையில், அமெரிக்க பாதுகாப்புத் துறை Pentagon வெளியிட்ட அறிக்கையில், “ஈரான் கச்சா எண்ணெய் கடத்தலில் ஈடுபட்டதாக முன்பே கருப்புப் பட்டியலில் சேர்க்கப்பட்ட கப்பலை ஆய்வு செய்து பறிமுதல் செய்துள்ளோம்” என தெரிவிக்கப்பட்டுள்ளது.

மேலும், “Right-of-Visit Maritime Interdiction” என்ற சட்ட அடிப்படையில், M/T Tifani கப்பலில் அமெரிக்க அதிகாரிகள் ஏறிச் சோதனை நடத்தியதாகவும், எந்த மோதலும் இன்றி அமைதியாக இந்த நடவடிக்கை நிறைவேற்றப்பட்டதாகவும் கூறப்பட்டுள்ளது.

பென்டகன் தகவலின்படி, இந்த கப்பல் “Stateless vessel” எனப்படும் – எந்த நாட்டின் அதிகாரப்பூர்வ பதிவும் இல்லாத கப்பலாக வகைப்படுத்தப்பட்டுள்ளது. தற்போது போட்ஸ்வானா கொடியை ஏந்தியிருந்தாலும், அதன் சட்டப்பூர்வ நிலைமை சந்தேகத்திற்குரியது என தெரிவிக்கப்பட்டுள்ளது.

இந்நிகழ்வு, அமெரிக்கா மற்றும் ஈரான் இடையிலான பதற்றம் அதிகரித்துள்ள சூழ்நிலையில் இடம்பெற்றுள்ளது. குறிப்பாக, Strait of Hormuz வழியாக கப்பல் போக்குவரத்து கடந்த 24 மணி நேரத்தில் பெருமளவில் பாதிக்கப்பட்டுள்ளதாக வெளிநாட்டு ஊடகங்கள் தெரிவிக்கின்றன.

அமெரிக்க அதிகாரிகள் மேலும், “சர்வதேச கடல் எல்லைகள் தடைசெய்யப்பட்ட கப்பல்களுக்கு பாதுகாப்பான இடமல்ல” என வலியுறுத்தியுள்ளதுடன், ஈரானுக்கு ஆதரவளிக்கும் எந்தவொரு சட்டவிரோத கடல் போக்குவரத்தையும் தடுக்க உலகளாவிய நடவடிக்கைகள் தொடரும் என்றும் தெரிவித்துள்ளனர்.