ஈரான் - அமெரிக்கா இடையே பேச்சுவார்த்தை முறிவு: போர் நிறுத்த மீறல் குற்றச்சாட்டு

அமெரிக்கா போர் நிறுத்தத்தை மீறும் செயல்களில் ஈடுபட்டிருப்பதாகக் குற்றம்சாட்டும் ஈரான், தற்போதைய சூழலில் திட்டமிடப்பட்டிருந்த இரண்டாம் கட்டப் பேச்சுவார்த்தையில் பங்கேற்க  தனது பேச்சுவார்த்தைக் குழு இஸ்லாமாபாத் செல்வதற்கான திட்டங்கள் எதுவும் இல்லை என்றும், அடுத்த சுற்றுப் பேச்சுவார்த்தைகளுக்குத் தற்போது எந்தத் திட்டமும் இல்லை என்றும் வெளியுறவு அமைச்சக செய்தித் தொடர்பாளர் இஸ்மாயில் பாகாயி தெரிவித்ததாக ஈரானிய சர்வதேச ஊடகங்கள் செய்தி வெளியிட்டுள்ளன.

கடந்த ஏப்ரல் 12 ஆம் தேதி இஸ்லாமாபாத்தில் நடைபெற்ற முதற்கட்டப் பேச்சுவார்த்தைகள், எந்த உடன்பாடும் இல்லாமல் முடிவடைந்தன. இந்நிலையில், பாகிஸ்தான் பிரதமர் ஷெஹ்பாஸ் ஷெரீஃப் மற்றும் படைத்தலைவர் ஜெனரல் ஆசிம் முனீர் ஆகியோரின் மத்தியஸ்த முயற்சியின் பேரில் இரண்டாம் கட்டப் பேச்சுவார்த்தையை நடத்த அமெரிக்கா முடிவு செய்திருந்தது. வெள்ளை மாளிகையின் அறிவிப்பின்படி, அமெரிக்கத் துணைத் தலைவர் ஜே.டி. வான்ஸ் தலைமையில் ஸ்டீவ் விட்காஃப் மற்றும் ஜாரெட் குஷ்னர் ஆகியோர் இஸ்லாமாபாத் செல்வதாகத் திட்டமிடப்பட்டிருந்தது.

இருப்பினும், இந்த முயற்சிக்கு ஈரான் பெரும் பின்னடைவை ஏற்படுத்தியுள்ளது. "தற்போது அமெரிக்காவுடன் புதிய பேச்சுவார்த்தைகளுக்கான திட்டங்கள் எதுவும் எங்களிடம் இல்லை" என ஈரான் வெளியுறவு அமைச்சு செய்தித் தொடர்பாளர் எஸ்மாயில் பாகாயி வலியுறுத்தினார். மேலும், பாகிஸ்தானின் மத்தியஸ்தத் திறனிலும் ஈரானுக்கு நம்பிக்கை இழப்பு ஏற்பட்டுள்ளதாகத் தகவல்கள் வெளியாகியுள்ளன. "அமெரிக்கர்களையும் பாகிஸ்தானிகளையும் நம்ப முடியாது" என ஈரான் வெளியுறவுத் துறை வட்டாரங்கள் தெரிவித்துள்ளன.

தற்போதைய சூழலில் பேச்சுவார்த்தைகள் சாத்தியமில்லை என்பதற்கு முக்கியக் காரணமாக, ஈரான் அமெரிக்காவின் போர் நிறுத்த மீறல்களைச் சுட்டிக்காட்டுகிறது:

ஹோர்முஸ் நீரிணையில் அமெரிக்கா தொடர்ந்து கடற்படை முற்றுகையைப் பராமரித்து வருவதாகவும், இது போர் நிறுத்தத்தை மீறும் செயல் என்றும் ஈரான் குற்றம்சாட்டுகிறது.

 ஒமான் வளைகுடாவில் ஈரானிய வணிகக் கப்பல் 'M/V Touska'வை அமெரிக்கக் கடற்படை கைப்பற்றியதும் போர் நிறுத்த மீறலே என ஈரான் தெரிவித்துள்ளது. இந்த நிகழ்வுக்குப் பதிலடி கொடுக்கப்படும் என இராணுவமும் எச்சரித்துள்ளது.

அமெரிக்கா, ஈரானின் அணுசக்தித் திட்டத்தை முழுமையாகக் கைவிட வேண்டும் எனும் அதிகப்படியான கோரிக்கைகளை முன்வைத்ததாகவும், தங்களின் செறிவூட்டப்பட்ட யுரேனியத்தை வெளிநாட்டிற்கு மாற்றுவது திட்டவட்டமாக மறுக்கப்படுகிறது எனவும் பாகாயி தெளிவுபடுத்தினார்.

 "எங்களின் தேசிய நலன்களைப் பாதுகாப்பதில் காலக்கெடு அல்லது இறுதி எச்சரிக்கைகளை நாங்கள் நம்புவதில்லை" என பாகாயி கூறியுள்ளார்.

ஏப்ரல் 22 ஆம் தேதியுடன் இரண்டு வாரப் போர் நிறுத்தம் முடிவடையவுள்ளது. இந்த நிலையில், ஈரான் தனது கோரிக்கைகளை ஏற்கவில்லையெனில், "ஈரானின் ஒவ்வொரு மின் நிலையத்தையும், ஒவ்வொரு பாலத்தையும் தரைமட்டமாக்குவோம்" என அமெரிக்க அதிபர் டிரம்ப் கடுமையாக எச்சரித்துள்ளார்.

இதற்கு ஈரான் தரப்பும் கடுமையாக பதிலளித்துள்ளது. "அமெரிக்காவும் இஸ்ரேலும் போரைத் தொடங்க விரும்பினால், நாங்கள் தயாராக இருக்கிறோம்" என பாகாயி எச்சரித்துள்ளார்.

ஏற்கனவே, இந்த முட்டுக்கட்டையின் தாக்கம் உலகப் பொருளாதாரத்திலும் தெரிகிறது. ஹோர்முஸ் நீரிணையில் நிலவும் நிச்சயமற்ற நிலை காரணமாக, மூல எண்ணெய் விலை 6%க்கும் அதிகமாக உயர்ந்துள்ளது. பிரெண்ட் கச்சா எண்ணெயின் விலை பீப்பாய் ஒன்றுக்கு $96.25 ஆகவும், அமெரிக்க கச்சா எண்ணெய் $87.88 ஆகவும் உயர்ந்துள்ளது.