ஊடக ஒடுக்குமுறைக்கு வழிவகுக்கும் பட்டய நிறுவன மசோதா!

இலங்கையில் பல ஆண்டுகளாக ஊடகவியலாளர்கள் உள்ளிட்ட ஊடக சமூகத்தினர், ஊடகத் தொழில்முறையினருக்கென ஒரு Chartered Institute (பட்டய நிறுவனம்) உருவாக்கப்பட வேண்டிய அவசியத்தை வலியுறுத்தி வந்துள்ளனர். இத்தேவை ஊடக சமூகத்தின் உடனடி கவனத்திலிருந்து மங்கியிருந்த நிலையில், அத்தகைய ஒரு நிறுவனத்தை நிறுவுவதற்கான மசோதா வரைவு அண்மையில் (2026 ஜூன் 5 ஆம் திகதி) இலக்கமிடப்படாத வர்த்தமானி (Gazette) மூலம் வெளியிடப்பட்டுள்ளது.

இந்த ஆவணத்தை இலங்கை உழைக்கும்  ஊடகவியலாளர்கள் சங்கம் (Sri Lanka Working Journalists’ Association - SLWJA) கவனமாக ஆய்வு செய்துள்ளது.

எங்களது மதிப்பீட்டின்படி, இந்த நிறுவனத்தை உருவாக்குவதற்கான முயற்சியின் உண்மையான நோக்கம் ஊடக முன்னேற்றம் அல்ல; மாறாக அது ஊடக ஒடுக்குமுறையை நோக்கமாகக் கொண்டுள்ளது என்பது தெளிவாகிறது.

ஊடகவியலாளர்களின் சுதந்திரம், தொழில்முறை வளர்ச்சி, நலன், ஒழுக்கநெறி மேம்பாடு மற்றும் ஊடகக் கல்வி போன்ற விடயங்களை கையாளும் நிறுவனம் முழுமையான சுயாதீனத்துடன் செயல்பட வேண்டும் என்பதில் எங்களுக்கு உறுதியான நம்பிக்கை உள்ளது

ஆனால் இந்த வர்த்தமானியில் முன்மொழியப்பட்டுள்ள நிறுவனம், ஊடக அமைச்சர் நியமிக்கும் மற்றும் அவருக்கு கீழ்ப்படிந்திருக்கும் நபர்களின் கட்டுப்பாட்டில் இயங்கும் வகையில் வடிவமைக்கப்பட்டுள்ளது. இந்த மசோதாவில் உள்ள பல அபாயகரமான பிரிவுகள் குறித்து முழு ஊடகத் துறையின் கவனத்தை ஈர்க்க விரும்புகிறோம்.

மசோதாவில் உள்ள ஒடுக்குமுறை அம்சங்கள்

1. நிர்வாக அதிகாரத்தை அரசாங்கமும் அமைச்சரும் முழுமையாகக் கட்டுப்படுத்துதல்

பிரிவு 5(4)(a) – நிரந்தர நிர்வாக சபை நியமிக்கப்படும் வரை, நிறுவனத்தை நிர்வகிக்க இடைக்கால சபையை நியமிக்கும் முழு அதிகாரம் அமைச்சருக்கு வழங்கப்பட்டுள்ளது.

பிரிவு 5(4)(a)(i) மற்றும் (ii) – இந்த இடைக்கால சபையில் அமைச்சின் செயலாளர் மற்றும் அவர் (அமைச்சரின் ஒப்புதலுடன்) நியமிக்கும் ஆறு உறுப்பினர்கள் இடம்பெறுவர்.

பிரிவு 5(4)(b) – நிரந்தர சபை உறுப்பினர்களைத் தேர்ந்தெடுக்கும் விதிமுறைகளையும் இந்த அரசாங்க நியமன இடைக்கால சபையே வகுக்கும்.

இதன் விளைவாக, எதிர்காலத்தில் எந்தவொரு அகங்காரமான அல்லது குறுகிய பார்வையுடைய ஊடக அமைச்சரின் விருப்பப்படி செயல்படும் நபர்களே நிறுவனத்தின் நிர்வாகத்தை கட்டுப்படுத்தும் அபாயம் உருவாகிறது.

2. ஊடகவியலாளர்களை தண்டிப்பதற்கான "ஒழுக்காற்றுப் பொலிஸ்" அமைப்பை உருவாக்குதல்

பிரிவு 12(1)(c) – உறுப்பினர்களுக்கு எதிரான ஒழுக்காற்று விசாரணைகளை நடத்த ஒரு "Disciplinary Committee" (ஒழுக்காற்றுக் குழு) அமைக்கப்படுகிறது.

பிரிவு 23(1) மற்றும் 23(2) – "தொழில்முறை தவறுகள்" தொடர்பாக விசாரணை நடத்த இந்தக் குழுவுக்கு பரந்த அதிகாரங்கள் வழங்கப்படுகின்றன.

பிரிவு 24 – தொழில்முறை தவறுகளில் குற்றவாளி எனத் தீர்ப்பளிக்கப்பட்ட ஊடகவியலாளர்களின் உறுப்பினர் பதவியை ரத்து செய்தல், எச்சரிக்கை வழங்கல் அல்லது ஒரு வருடம் வரை இடைநீக்கம் செய்தல் போன்ற அதிகாரங்கள் நிர்வாக சபைக்கு வழங்கப்படுகின்றன.

இது தொழில்முறை வளர்ச்சியை ஊக்குவிப்பதற்குப் பதிலாக அதை ஒடுக்குவதே உண்மையான நோக்கம் என்பதை வெளிப்படுத்துகிறது.

3. விதிமுறைகளை இயற்றும் முழு அதிகாரத்தை அமைச்சரிடம் ஒப்படைத்தல்

பிரிவு 25(1) – சட்டத்தின் கீழ் விதிமுறைகளை உருவாக்கும் முழு அதிகாரமும் அமைச்சருக்கு மட்டுமே வழங்கப்பட்டுள்ளது.

இது நிறுவனத்தின் சுயாதீனத்தைக் குலைத்து, அமைச்சர் விரும்பியபடி விதிகளை உருவாக்கும் சூழலை ஏற்படுத்துகிறது.

4. முழு ஊடகத் துறையையும் ஒரே கட்டுப்பாட்டுக்குள் கொண்டு வருதல்

பிரிவு 27 – "Media Professionals" என்ற வரையறையின் கீழ் எழுத்தாளர்கள், உள்ளடக்க ஆசிரியர்கள், அறிவிப்பாளர்கள், பதிப்பாளர்கள், ஊடக உரிமையாளர்கள், நிர்வாகிகள் மற்றும் காணொளி தயாரிப்பாளர்கள் உள்ளிட்ட அனைவரும் இந்த நிறுவனத்தின் கட்டுப்பாடு மற்றும் ஒழுக்காற்று விதிகளின் கீழ் கொண்டுவரப்படுகின்றனர்.

5. சுயாதீனத்தை பறித்தல்

பிரிவு 4(a) – ஊடகக் கல்வி மற்றும் தொழில்முறை விடயங்களில் அமைச்சருக்கு ஆலோசனை வழங்குவது நிறுவனத்தின் கடமையாக குறிப்பிடப்பட்டுள்ளது.

பிரிவு 4(na) – வெளிநாட்டு நிதியுதவி அல்லது நன்கொடைகளைப் பெறுவதற்கு நிதி அமைச்சின் வெளிநாட்டு வளங்கள் திணைக்களத்தின் முன் அனுமதி கட்டாயமாக்கப்பட்டுள்ளது.

தற்போதைய அரசாங்கத்தின் செயற்பாடுகள்

தேசிய மக்கள் சக்தி (NPP / மாலிமாவ) அரசாங்கம், Online Safety Act (OSA) மற்றும் Prevention of Terrorism Act (PTA) ஆகியவற்றை ரத்து செய்வதாக வாக்குறுதி அளித்து ஆட்சிக்கு வந்தது. ஆனால் இன்று அதே சட்டங்களின் கீழ் பாடகர்கள் மற்றும் வடக்கில் சுவரொட்டிகள் ஒட்டிய இளைஞர்கள் கைது செய்யப்படுகின்றனர்.

தமிழ் எழுத்தாளர்களின் நூல்கள் பறிமுதல் செய்யப்பட்டு தணிக்கைக்கு உட்படுத்தப்படும் சூழல் உருவாக்கப்பட்டுள்ளது. அரசின் தவறுகளை வெளிக்கொணரும் ஊடக நிறுவனங்களின் ஆசிரியர்கள் குற்றப்புலனாய்வுத் திணைக்களத்திற்கு (CID) அழைக்கப்படுகின்றனர்.

மேலும், தொலைக்காட்சி நிலையங்களின் ஒளிபரப்பு உரிமங்களை இரத்து செய்யுமாறு தொலைத்தொடர்பு ஒழுங்குமுறை ஆணைக்குழுவிடம் கோரிக்கை விடுக்கும் அரசாங்கமாகவும் இது உள்ளது. ஊடகவியலாளர்களுக்கு எதிராக இடம்பெற்ற குற்றங்களுக்கு நீதி கோரும் கோரிக்கைகளை புறக்கணிப்பதோடு, தகவல் அறியும் உரிமைச் சட்டத்தையும் (RTI) பலவீனப்படுத்தும் முயற்சியில் ஈடுபட்டுள்ளது.

எங்கள் கோரிக்கை

அரசாங்கத்தின் கட்டுப்பாட்டிலிருந்து முழுமையாக விடுபட்ட, சுயாதீன நிர்வாக அமைப்பைக் கொண்ட ஊடகத் தொழில்முறையினருக்கான Chartered Institute ஒன்றை உருவாக்குவதற்காக, சிங்களம், தமிழ் மற்றும் ஆங்கில மொழி ஊடகங்களில் பணிபுரியும் அனைத்து ஊடகத் தொழிலாளர்களும் ஒன்றிணையுமாறு அழைக்கிறோம்.

அரசின் கட்டுப்பாட்டிலிருந்து விடுபடாத எந்த நிறுவனமும் ஊடகச் சுதந்திரத்தை பாதுகாக்காது; மாறாக ஊடக ஒடுக்குமுறையை மேலும் வலுப்படுத்தும்.

ரங்க பண்டாரநாயக்க

தலைவர்

மிதுன் ஜயவர்தன

பொதுச் செயலாளர்

இலங்கை உழைக்கும் ஊடகவியலாளர்கள் சங்கம் (SLWJA).