மத்திய கிழக்கு போர் பதற்றம்: இலங்கைக்கு முழு ஆதரவு வழங்க தயாரான ரஷ்யா –

மத்திய கிழக்கில் நிலவி வரும் போர்நிலை காரணமாக உருவாகியுள்ள உலகளாவிய எரிசக்தி மற்றும் பொருளாதார அச்சுறுத்தல்களை எதிர்கொள்ள இலங்கைக்கு தேவையான அனைத்து வகையான உதவிகளையும் வழங்க ரஷ்யா தயாராக இருப்பதாக அந்நாட்டு எரிசக்தி பிரதி அமைச்சர் Roman Marshavin தெரிவித்துள்ளார்.

இலங்கைக்கு உத்தியோகபூர்வ விஜயம் மேற்கொண்டுள்ள அவர், இன்று (26) மாலை கொழும்பில் உள்ள ஜனாதிபதி செயலகத்தில் ஜனாதிபதி Anura Kumara Dissanayake அவர்களை சந்தித்து விரிவான கலந்துரையாடல் நடத்தினார்.

இந்தச் சந்திப்பின் போது, உலகளாவிய நெருக்கடி சூழ்நிலையை முன்னிட்டு இலங்கையின் எரிசக்தி பாதுகாப்பை உறுதி செய்ய ரஷ்யா உறுதியாக துணைநிற்கும் என அவர் தெரிவித்தார்.

மேலும் எரிசக்தி துறையில் தடையற்ற விநியோகத்தை உறுதி செய்தல்,

நவீன தொழில்நுட்பங்கள் மற்றும் இயந்திர உபகரணங்களை வழங்குதல்,

உட்கட்டமைப்பு மேம்பாட்டிற்கு தேவையான ஆதரவு வழங்குதல்

போன்ற பல துறைகளில் ஒத்துழைக்கத் தயார் எனவும் Roman Marshavin குறிப்பிட்டார்.

இதற்குப் பதிலளித்த ஜனாதிபதி Anura Kumara Dissanayake, இலங்கை–ரஷ்யா உறவு பல தசாப்தங்களாக வலுவாக இருந்து வருவதை சுட்டிக்காட்டினார். குறிப்பாக, சோவியத் காலத்தில் வழங்கப்பட்ட தொழில்நுட்ப மற்றும் கைத்தொழில் உதவிகள் நாட்டின் பொருளாதார வளர்ச்சிக்கு முக்கிய பங்காற்றியதாகவும் அவர் நினைவுகூர்ந்தார்.

அதேவேளை, ரஷ்யா இலங்கைக்கு முக்கிய சுற்றுலா சந்தையாகத் திகழ்வதையும், இலங்கை மாணவர்களுக்கு வழங்கப்படும் உயர்கல்வி வாய்ப்புகளையும் அவர் பாராட்டினார். சர்வதேச அரங்குகளில் இலங்கைக்கு வழங்கி வரும் ஆதரவிற்கும் நன்றியைத் தெரிவித்தார்.

மத்திய கிழக்கில் போர் பதற்றம் அதிகரித்து, ஹோர்முஸ் நீரிணை மூடப்பட்டுள்ளதாகக் கூறப்படும் சூழலில், ரஷ்யாவின் இந்த உறுதிமொழி இலங்கையின் எரிசக்தி பாதுகாப்பிற்கு முக்கிய ஆதரவாக அமையும் என அரசியல் மற்றும் பொருளாதார ஆய்வாளர்கள் கருத்து வெளியிட்டுள்ளனர்.