துபாயிலும் சென்னையிலும் ஸ்ரீலங்கன் ஏர்லைன்ஸுக்கு இரட்டை நிதி மோசடி!

ஐக்கிய அரபு இராஜ்யம் மற்றும் இந்தியாவின் சென்னையில் இடம்பெற்றதாக கூறப்படும் இரண்டு தனித்தனி நிதி மோசடி சம்பவங்கள் தொடர்பில் ஸ்ரீலங்கன் ஏர்லைன்ஸ் சனிக்கிழமை (மே 16) சிறப்பு அறிக்கை வெளியிட்டுள்ளது.

துபாயில் உள்ள ஒரு சேவை வழங்குநருக்கு செலுத்த வேண்டிய 9,74,000 UAE திர்ஹம் தொகை, அவர்களுக்கு கிடைக்காத சம்பவம் வெளிச்சத்திற்கு வந்துள்ளது.

ஆரம்ப விசாரணையில் தெரியவந்தது என்னவெனில், மூன்றாம் தரப்பு ஒருவர் சேவை வழங்குநரின் மின்னஞ்சல் கணக்கில் அத்துமீறி நுழைந்து, அதிகாரப்பூர்வ தொடர்பாடல்கள் வழியாக வங்கி விவரங்களையும் ஆதார ஆவணங்களையும் மோசடியாக மாற்றியமைத்துள்ளார். நிறுவனமோ, அந்த மாற்றப்பட்ட விவரங்களை உண்மையானவை என்று நம்பி பணம் செலுத்தியது.

விவகாரம் தெரிந்தவுடன், அந்த வங்கி கணக்கிற்கான அனைத்து பணப்பரிவர்த்தனைகளையும் நிறுவனம் உடனடியாக நிறுத்தியது. தொடர்ந்து, UAE அதிகாரிகளிடமும், இலங்கை குற்றப் புலனாய்வு துறையிடமும் (CID) புகார் அளிக்கப்பட்டுள்ளது. இரு நாடுகளிலும் விசாரணைகள் ஆரம்பிக்கப்பட்டுள்ளன.

பணம் செலுத்தியது அதிகாரப்பூர்வ மின்னஞ்சல் அறிவுறுத்தல்கள் மற்றும் அங்கீகரிக்கப்பட்ட கையொப்பங்களின் அடிப்படையிலேயே நடைபெற்றது என்றும், இது சேவை வழங்குநரின் மின்னஞ்சல் அமைப்பில் ஏற்பட்ட பாதுகாப்பு மீறலால் நிகழ்ந்தது என்றும் நிறுவனம் தெரிவித்துள்ளது. இது தமது கட்டுப்பாட்டுக்கு அப்பாற்பட்டதால், தொகை பெறப்படாததற்கான பொறுப்பை ஏற்க முடியாது என்று ஸ்ரீலங்கன் ஏர்லைன்ஸ் தெளிவுபடுத்தியுள்ளது.

இந்தியாவின் சென்னையில் உள்ள ஸ்ரீலங்கன் ஏர்லைன்ஸ் அலுவலகத்தில் நிதி பிரிவில் பணியாற்றிய சில ஊழியர்கள், 22 மில்லியன் இந்திய ரூபாய் அளவிலான மோசடியில் ஈடுபட்டதாக கூறப்படுகிறது.

போலியான பில்கள், கட்டண விவரங்கள் மற்றும் கையொப்பங்கள் இயற்றப்பட்டதாக நிறுவனம் தெரிவித்துள்ளது. கொழும்பு தலைமையகம் நடத்திய உள் ஆய்வில் இந்த முரண்பாடுகள் கண்டுபிடிக்கப்பட்டதை தொடர்ந்து, விசாரணை உடனடியாக தொடங்கப்பட்டது.

விசாரணை முன்னேறிய நிலையில், சம்பந்தப்பட்ட ஊழியர்கள் பணிக்கு வரவில்லை என்றும், அவர்களுக்கு எதிராக சட்ட நடவடிக்கைகள் மேற்கொள்ளப்பட்டு வருவதாகவும் நிறுவனம் தெரிவித்துள்ளது. இந்திய சட்ட அமலாக்க அதிகாரிகளுக்கும் விஷயம் அறிவிக்கப்பட்டுள்ளது.

இழந்த நிதியை மீட்டெடுக்க நடவடிக்கைகள் தொடர்கின்றன என்றும், விசாரணைகள் முழு வேகத்தில் நடந்து வருகின்றன என்றும் ஸ்ரீலங்கன் ஏர்லைன்ஸ் கடைசியாக தெரிவித்துள்ளது.