பாகிஸ்தான் வான்வழித் தாக்குதல்: காபூல் உட்பட ஆப்கான் நகரங்கள் சிதறல்;

பாகிஸ்தான் ஆப்கானிஸ்தானின் நாடுகளுக்கிடையே பல மாதங்களாக நிலவி வந்த எல்லைப் பதட்டங்கள் வெள்ளிக்கிழமை அன்று வெளிப்படையான மோதலாக மாறியுள்ள நிலையில், பாகிஸ்தான் ஆப்கானிஸ்தானின் தலைநகர் காபூல் உட்பட இரண்டு பெரிய நகரங்கள் மீது வான்வழித் தாக்குதல்களை நடத்தியது.

தாலிபான் அரசாங்கத்தின் செய்தித் தொடர்பாளர் ஜபியுல்லா முஜாஹித் வெளியிட்டுள்ள அறிக்கையில், 60 லட்சம் மக்கள் வசிக்கும் காபூல் நகரும், தாலிபானின் உச்சத் தலைவர் ஷேக் ஹைபதுல்லா அகுண்ட்சாடா தங்கியிருக்கும் தெற்கு நகரமான கந்தஹாரும், எல்லை மாகாணமான பாக்டியாவும் குறிவைக்கப்பட்டு தாக்கப்பட்டதாகத் தெரிவித்துள்ளார்.

இந்தத் தாக்குதல்கள் குறித்து ஆப்கானிஸ்தான் மற்றும் பாகிஸ்தான் அதிகாரிகள் வெளியிட்டுள்ள தகவல்களின் படி, ஆப்கானிஸ்தான் படைகள் பாகிஸ்தானின் எல்லைப் பகுதியில் உள்ள இராணுவ நிலைகள் மீது நடத்திய தாக்குதலுக்கு பதிலடி கொடுக்கும் வகையில், சில மணி நேரங்களுக்குப் பிறகே பாகிஸ்தான் இந்த வான்வழித் தாக்குதலை மேற்கொண்டுள்ளது. வாரத்தின் தொடக்கத்தில் பாகிஸ்தான் நடத்திய தாக்குதல்களுக்கு எதிரான பதிலடிதான் ஆப்கானிஸ்தானின் நடவடிக்கை என வட்டாரங்கள் தெரிவிக்கின்றன.

இந்நிலையில், பாகிஸ்தானின் பாதுகாப்பு அமைச்சர் கவாஜா ஆசிஃப், சமூக ஊடகத் தளமான ‘எக்ஸ்’ இல் வெளியிட்டுள்ள பதிவில், "எங்கள் பொறுமையின் கிண்ணம் நிரம்பி வழிந்துவிட்டது. இப்போது எங்களுக்கும் உங்களுக்கும் இடையே வெளிப்படையான போர்" என்று குறிப்பிட்டுள்ளார். இரு நாடுகளுக்கும் இடையிலான இராஜதந்திர முயற்சிகள் தோல்வியடைந்து, நிலைமை போரை நோக்கி நகர்ந்திருப்பதை இந்த அறிக்கை உறுதிப்படுத்துகிறது.

இரு நாடுகளுக்கும் இடையிலான உறவுகளில் ஏற்பட்டுள்ள மோசமான சரிவை இந்த தாக்குதல் எடுத்துக்காட்டுகிறது. இதற்கு முந்தைய நாட்களில் எல்லைப் பகுதிகளில் அவ்வப்போது மோதல்கள் ஏற்பட்டு வந்த நிலையில், தற்போதைய வான்வழித் தாக்குதல் மோதலை புதிய கட்டத்திற்கு கொண்டு சென்றுள்ளது.