ஓய்வு பெற்ற மின்சார சபை ஊழியர்களுக்கு இழப்பீடு இல்லை – ஓய்வூதியச் சங்கம் கண்டனம்

இலங்கை மின்சார சபை கலைக்கப்பட்டதை  தொடர்ந்து, தன்னார்வ ஓய்வுத் திட்டத்தில் விண்ணப்பித்தவர்களுக்கு உரிய இழப்பீடு இதுவரை வழங்கப்படவில்லை என ஓய்வூதியச் சங்கம் தெரிவித்துள்ளது.

மார்ச் மாதம் 9ஆம் தேதி இழப்பீடு வழங்கப்படும் என அரசாங்கம் உறுதியளித்திருந்த போதிலும், இழப்பீட்டை வழங்கத் தவறிவிட்டதாகவும் சங்கம்  குற்றம்சாட்டுகிறது.

இதனால் தமது அடிப்படை மனித உரிமைகள் மீறப்பட்டதாக மனித உரிமைகள் ஆணைக்குழுவிற்குக் கடிதம் எழுதியுள்ளதாகவும், இழப்பீடு கிடைக்காததால் கடுமையான பொருளாதார நெருக்கடியை எதிர்கொள்வதாகவும் அந்த ஓய்வூதியர்கள் தெரிவித்துள்ளனர்.

வரவிருக்கும் சிங்களத் தமிழ் புத்தாண்டைக் கூட குடும்பத்தினருடன் கொண்டாட முடியாத நிலை ஏற்பட்டுள்ளதாகவும் அவர்கள் கவலை தெரிவித்துள்ளனர்.

இது தொடர்பாக எரிசக்தி அமைச்சர் திரு. குமார் ஜெயகோடிக்கு கடிதம் அனுப்ப நடவடிக்கை எடுத்துள்ளதாகவும் சம்பந்தப்பட்ட ஊழியர்கள் குறிப்பிட்டுள்ளனர்.

மின்சார சபையின் மறுசீரமைப்பின் கீழ், சபை 6 நிறுவனங்களாகப் பிரிக்கப்பட்டது. உடன்பாடு இல்லாத ஊழியர்களுக்குத் தன்னார்வ ஓய்வுக்கான வாய்ப்பு வழங்கப்பட்டது. அதன்படி ஏறத்தாழ 2,000 ஊழியர்கள் விண்ணப்பித்து மார்ச் 9ஆம் தேதி ஓய்வு பெற்றனர்.

எனினும், இழப்பீடு மட்டுமின்றி, ஊழியர்களின் சேமநிதி, நம்பிக்கை நிதி, கிராச்சுவிட்டி ஆகியவற்றின் நிலுவைகளும் இதுவரை விடுவிக்கப்படவில்லை எனத் தெரிவிக்கப்படுகிறது. மேலும், 55 வயது நிறைவுற்று 18 ஆண்டுகள் தொடர்ச்சியான சேவையில் இருந்தும், மின்சார சபையின் சட்டப்பூர்வ ஓய்வூதியத்தைப் பெற முடியாமல் உள்ளதாகவும் அந்த ஊழியர்கள் கூறுகின்றனர்.

இது குறித்து எரிசக்தி  பிரதி அமைச்சர் முஹம்மது இலியாஸ் முஹம்மது  தெரிவிக்கப்பட்டதாகவும், புத்தாண்டுக்கு முன் குறைந்தபட்சம் ஒரு பகுதி இழப்பீடு வழங்கப்படும் என அவர் உறுதியளித்திருந்த போதிலும் இதுவரை எதுவும் கிடைக்கவில்லை என்றும் ஓய்வூதியச் சங்கம் தெரிவித்துள்ளது.

ஓய்வூதியர்களின் சங்கம் மூலம் இது குறித்துத் தனக்குத் தெரியவந்ததாகவும், பணம் நேற்று வங்கிக் கணக்கில் செலுத்தப்படும் என அதிகாரிகள் தெரிவித்ததாகவும் அவர் கூறினார். மேலும் விசாரணைக்குப் பின்னர் மேலதிக தகவல்களை வெளியிடத் தயாராக இருப்பதாகவும் துணை அமைச்சர் தெரிவித்தார்.